dīghā jāgarato ratti, ~ dīghaṁ santassa yojanaṁ,
dīgho bālānaṁ saṁsāro ~ saddhammaṁ avijānataṁ. [60]

carañ-ce nādhigaccheyya ~ seyyaṁ sadisam-attano,
ekacarⁱyaṁ daḷhaṁ kayⁱrā, ~ natthi bāle sahāyatā. [61]

“puttā matthi dhanam-matthi” ~ iti bālo vihaññati,
attā hi attano natthi ~ kuto puttā kuto dhanaṁ. [62]

yo bālo maññati bālyaṁ, ~ paṇḍito vāpi tena so,
bālo ca paṇḍitamānī ~ sa ve bālo ti vuccati. [63]

yāvajīvam-pi ce bālo ~ paṇḍitaṁ payⁱrupāsati
na so dhammaṁ vijānāti, ~ dabbī sūparasaṁ yathā. [64]

muhuttam-api ce viññu ~ paṇḍitaṁ payⁱrupāsati
khippaṁ dhammaṁ vijānāti, ~ jivhā sūparasaṁ yathā. [65]

[BJT page 040]

caranti bālā dummedhā ~ amitteneva attanā,
karontā pāpakaṁ kammaṁ ~ yaṁ hoti kaṭukapphalaṁ. [66]

na taṁ kammaṁ kataṁ sādhu ~ yaṁ katvā anutappati,
yassa assumukho rodaṁ ~ vipākaṁ paṭisevati. [67]

tañ-ca kammaṁ kataṁ sādhu ~ yaṁ katvā nānutappati,
yassa patīto sumano ~ vipākaṁ paṭisevati. [68]

madhuvā maññati bālo, ~ yāva pāpaṁ na paccati,
yadā ca paccati pāpaṁ, ~ atha bālo dukkhaṁ nigacchati. [69]

māse māse kusaggena ~ bālo bhuñjetha bhojanaṁ,
na so saṅkhātadhammānaṁ ~ kalaṁ agghati soḷasiṁ. [70]

na hi pāpaṁ kataṁ kammaṁ ~ sajju khīraṁ va muccati,
ḍahantaṁ bālam-anveti ~ bhasmacchanno va pāvako. [71]

yāvad-eva anatthāya ~ ñattaṁ bālassa jāyati,
hanti bālassa sukkaṁsaṁ ~ muddham-assa vipātayaṁ. [72]

asataṁ bhāvanam-iccheyya, ~ purekkhārañ-ca bhikkhusu,
āvāsesu ca issarⁱyaṁ, ~ pūjā parakulesu ca. [73]

“mameva kataṁ maññantū ~ gihī pabbajitā ubho,
mameva ativasā assu ~ kiccākiccesu kismici”,
iti bālassa saṁkappo ~ icchā māno ca vaḍḍhati. [74]

aññā hi lābhūpanisā, ~ aññā nibbāṇagāminī, Editor's note: BJT, nibbāna-, against its usual spelling.⁰¹
evam-etaṁ abhiññāya ~ bhikkhu buddhassa sāvako
sakkāraṁ nābhinandeyya, ~ vivekam-anubrūhaye. [75]